Doarjja bargonávccaid buorideapmái
Doarjja bargonávccaid buorideapmái
Bargoaddis lea guovddáš rolla bargiid bargonávccaid bajásdoallamis. Bargoaddi bargui gullá soahpat buorre doaibmangeavadagaid birra ovttas bargiiguin ja bargodearvvasvuođafuolahusain. Bargoaddi maiddái čuovvu bargiid veaju ja darvána dakkár áššiide mat čuhcet bargiid buorredillái, dorvvolašvuhtii ja bargonávccaide. Dárbbu mielde ovdaolmmoš hálešta fuomášumiidis birra bargiin.
Dus bargin lea oaiveovddasvástádus iežat dearvvasvuođa, veaju ja bargonávccaid bajásdoallamis. Dus lea maiddái geatnegasvuohta čuovvut bargoaddi mearrádusaid ja rávvagiid sihke ovttas sohppon geavadagaid ja dan bokte nanosmahttit buohkaid bargodorvvolašvuođa ja bargoveaju bargosajistat. Sáhtát dárbbu mielde dorvvastit bargoaddái, hovdii ja bargodearvvasvuođafuolahussii bargonávccaide laktáseaddji áššiin.
Bargodearvvasvuođafuolahus lea bargonávccaid áššedovdi. Dan bargui gullá čuovvut bargiid veaju ja fállat doarjaga bargonávccaid bajásdoallamis sihke doarjut ja bagadit bargoaddiid ja ovdaolbmuid bargonávccaide laktáseaddji gažaldagain. Bargi sáhttá dáhttut bargiidsuodjalansáttaolbmo ja bargiidáirasa oassálastit guorahallat iežas bargoveaju ja -návccaid.
Juos it leat barggus, sáhtát várret áiggi bargguhis olbmuid dearvvasvuođadárkkástussii. Bargguhis olbmuid dearvvasvuođadárkkástusa ulbmil lea buoridit bargguhis olbmo dearvvasvuođa ja veaju, guorahallat su bargo- ja doaibmannávccaid sihke dárbbu mielde veahkehit gávdnat dárbbašlaš joatkkabálvalusaid. Dárkkástusa čađaha dábálaččat dearvvasvuođadivššár, dahje dárbbu mielde doavttir. Dearvvasvuođadivššára čađahan dárkkástus lea nuvttá. Vejolaš joatkkadutkamušain berrojuvvo máksu fámus leahkki hattiid mielde. Dearvvasvuođadárkkástusas sohppojuvvojit konkrehta juksanáigumušat olbmo iežas dárbbuid vuođul.