Eaktodáhtolašdoaimmat, veardásašdoarjja ja vásáhusdoaimmat
Eaktodáhtolašdoaimmat, veardásašdoarjja ja vásáhusdoaimmat
Eaktodáhtolašdoaimmat
Eaktodáhtolašdoaimmat buktet ilu, sisdoalu ja mearkkašumi eallimii. Eaktodáhtolašdoaimmain oaččot ođđa vásáhusaid ja oahpat ođđa dáidduid, ja beasat seammás fállat doarjaga ja veahki sihke lágidit vásáhusaid earáide.
Eaktodáhtolašdoaimmain lea Suomas guhkes historjá, ja máŋggat organisašuvnnat fállet máŋggalágan vejolašvuođaid oassálastit eaktodáhtolašdoaimmaide. Sáhtát beassat bargat alccesat dehálaš áššiid ovdii ja oassálastit aiddo dutnje, du dáidduide ja áigetávvalii heivvolaš doaimmaide.
Lähellä.fi-neahttabálvalussii leat čohkken organisašuvnnaid, servviid ja servošiid eaktodáhtolašdoaibmafálaldaga. Bálvalusas gávdnojit sihke guhkesáigge- ja geardelunddot barggut. Doppe gávdno maiddái diehtu eaktodáhtolašdoaimmaide laktáseaddji skuvlejumiin.
Veardásašdoarjja
Veardásašdoarjagis lea sáhka das, ahte olmmoš beassá ságastallat geainna nu, geas leat seammalágan vásáhusat go sus. Olmmoš sáhttá fállat veardásašdoarjaga nubbái iežas vásáhusaid vuođul. Veardásašdoarjaga dehálamos elemeanttat leat muitaleapmi ja guldaleapmi.
Go olmmoš buohccá, sutnje ja su lagažiidda šaddá dávjá stuorra diehtogoiku. Dieđu sáhttá oažžut dearvvasvuođafuolahusa ámmátolbmuid ja bálvalusaid sihke girjjálašvuođa lassin olbmuin, geat leat vásihan seamma váttisvuođa dahje buohcuvuođa, go olmmoš ieš.
Olbmuide lea dehálaš beassat gullat, maid diagnosa oaivvilda geavatlaččat ja mo dat čuohcá sin árgabeaieallimii. Dan lassin pasientii ja su lagažiidda lea dávjá geahpádussan, go sii besset háleštit dili birra earáiguin.
Orru buorre beassat háleštit geainna nu, gii duođas ádde. Dat sáhttá maid geahpedit lagažiid guorpmi, juos pasienta beassá háleštit fuolaidis birra vierisolbmuiguin. Veardásašdoarjjaolbmuin sáhttá leat maiddái álkit háleštit, go lagažiiguin.
Vásáhusaid juogadettiin olmmoš sáhttá dovdat ahte nubbi ipmirda. Dat lea čiekŋalis ja mearkkašahtti dovdu.
Loga lasi veardásašdoarjaga birra: Terveyskylän Vertaistalosta
Loga lasi Lappi guovddášbuohcceviesu eaktodáhtolašdoaimmain ja veardásašdoarjagis: OLKA Lappi
Vásáhusdoaimmat čalmmustahttet olbmo geahččanguovllu
Vásáhusdoaimmas lea sáhka olbmuid vásáhusain čoggon dieđuiguin ja ipmárdusain ávkkástallamis. Dát dieđut geavahuvvojit earáid veahkeheapmái ja doarjumii. Dáid dieđuid vuođul skuvlejit nuppiid, vai sii ges máhtášedje buorebut veahkehit čuovvovaččaid.
Vásáhusdoaimmaid ulbmil lea viiddidit ja čiekŋudit ámmátolbmuid dieđuid ja dáidduid sihke ovddidit bálvalusaid olbmuid vásáhusaid bokte čoggon dieđuid vuođul. Olbmuid vásáhusain sáhttit ovdamearkka dihte oahppat dan, mo dihto buohcuvuohta dahje lámisvuohta čuohcá su doaibmannávccaide ja vedjui árgabeaieallimis. Dáid dieđuid vuođul áššehasaid dárbbut sáhttet váldot buorebut vuhtii. Vásáhusaide vuođđuduvvi dieđuid sáhttá ávkinatnit bálvalusaid plánema, árvvoštallama ja ovddideami lassin maiddái oahpahusas.
Olbmuid, organisašuvnnaid ja searvegottiid buvttadan vásáhusdieđut ávkinadnojit buresveadjinguovllu doaimmaid jođiheamis, plánemis, ollašuhttimis, čuovvumis ja árvvoštallamis.
Organisašuvnnain ja searvegottiin sáhttá čoaggit dieđu ovdamearkka dihte jearahallanskoviiguin ja deaivvademiiguin. Organisašuvnnat ja searvegottit sáhttet maiddái oassálastit buresveadjinguovllu bálvalusaid ovddideapmái.
Mii ávkinatnit vásáhusdieđuid juolludeaddjiid ja ovddideapmái oassálasti áššehasaid dieđuid ja máhtuid bálvalusaid ovddideamis.