Mátkebálvalanguovddáš

Mátkebálvalanguovddáš fállá Lappi buresveadjinguovllus fievrridanbálvalusaid gaskkusteami. 

Mátkebálvalanguovddáža bokte sáhtát diŋgot lápmásiidbálvalus-, sosiálafuolahus- ja čálganváddolága mieldásaš fievrridanbálvalusaid sihke bálvalan-, áššiiddikšun- ja gohččunjoavkojohtolatmátkkiid. Dearvvasvuođafuolahusa mátkkit nu mo doavtter-, laboratoria-, - ja veajuiduhttinfitnamat eai gula Lappu buresveadjinguovllu buhtadan fievrridanbálvalusaide. Dearvvasvuođafuolahusa mátkkiide sáhtát ohcat buhtadusa Kelas.

Mátkebálvalanguovddáš fállá dán muttos gaskkustanbálvalusaid Anáris, Giemajávrris, Giemaeatnamis, Giemas, Kolaris, Muonás, Pelkosenniemis, Pellos, Roavenjárggas, Sallas, Suovvaguoikkas, Soađegilis, Tervolas, Durdnosis ja Badje-Durdnosis.

Ođđa gilvalahttin lea válbmanan ja dan mielde doaibma álgá loahppagease 2024 Eanodaga, Gihttela, Ranua, Roavenjárgga, Simo ja Ohcejoga gielddaid guovlluin.

Mátkebálvalanguovddáža bálvalanrávvejeaddjit ohcet áššehasaide heivvolaš mátkkoštanvuogi ja geainnu. Seammá guvlui ja seammá áiggi mátkkošteaddji áššehasaide fállojuvvojit oktasašsáhtut. Bálvalanrávvejeaddjit veahkehit áššehasaid geavahit maiddái áššiiddikšun-, bálvalan- ja joavkojohtolaga.

Fievrridanbálvalusat

Fievrridanbálvalusaide lea vuoigatvuohta olbmuin, geain leat erenoamáš váttisvuođat lihkadeamis ja geat eai sáhte váttu dahje buohcuvuođa dihte geavahit almmolaš joavkojohtolatneavvuid govttohis stuorra váttisvuođaid haga. Olbmos galgá leat maiddái virggálaš fievrridanbálvalusmearrádus.

Lápmásiidbálvalusaid sosiálabargi dahká fievrridanmearrádusaid. Fievrridanbálvalusat mieđihuvvojit sierra mánotbadjái. Mieđihuvvon mátkkiid meari ii oaččo rasttildit iige sirdit nuppi mánotbadjái.

Fievrridemiid diŋgon

Mátkebálvalanguovddáža telefonáššiiddikšun 016 860 2060 gohcá birra jándora.

Diŋgo sáhtu Mátkebálvalanguovddážis unnimusat 1,5 diimmu ovdal mátkki. Sáhtát diŋgot máŋgga mátkki seammá háve.

Juos du mátkkin vuolginčujuhus lea eará go du ruovttučujuhus, sáhtát diŋgot mátkki ovdadiŋgoma haga. Sáhttu boahtá maŋimustá 30 minuhta geahčen. Šluhtte mátkkiid unnimusat 30 minuhta ovdal mátkki álgima. Guitá sáhtu mátkki maŋŋá fievrridanbálvaluskoarttain. Mátkkiid iežatoasi rehket sáddejuvvo dutnje maŋŋelgihtii oktii mánus. 

Almmut čuovvovaš áššiid, go diŋgot mátkki

• vuolginčujuhusa, mearrebáikki ja diibmoáiggi.
• olmmošlogu, veahkkeneavvuid, mátkedávviriid meari ja eará spesiáladárbbuid.
• máinnaš sierra, juos dus lea áigedávval dahje deaivvadeapmi mearrebáikkis.
• almmut ovddal gihtii, juos mátkki áigge lea vuordimis 10 minuhta bisáneapmi. Mátkki áigge oažžu leat eanemusat okta 10 minuhta vuordinboddu unna áššiiddikšumii.

Áššehasaid iežaset evttohan oktasašsáhtuin ii berrojuvvo mátkki iežasoassi. Fievrridanbálvalusmearrádusain sáhtát maiddái mátkkoštit nuvttá bálvalanjohtolagas. Bálvalanjohtolatmátkkit eai golat juohke mánu mátkemeari.

Mieđuštanveahkki mátkkis

Áššehassii sáhttá mieđihit fievrridanbálvalusmearrádusas vuoigatvuođa mieđušteaddjái. Mieđušteaddji bargun lea veahkehit áššehasa dorvvolaččat vuolginsajis mearrebáikái. Mieđušteaddjin sáhttá doaibmat olmmoš, guhte ii leat ieš fievrridanbálvalusa oažžu ja sáhttá doaibmat mieđušteaddjin. Juos dus lea vuoigatvuohta geavahit vuoddji mieđušteaddjin, dus ii sáhte leat mielde eará mieđušteaddji. Mieđušteaddji mátkkošta ovttas áššehasain mávssu haga.  Eará mátkkošteaddjit mákset iežaset oasi táksemátkki hattis.

Invafievrridemiid vuoddji sáhtosta áššehasa dorvvolaččat lanjadagas biilii ja biillas mearresadjái. Vuoddji maid fuolaha áššáigullevaš gárastatvuogádaga juvlastullui.

Fievrridanbálvaluskoarta ja mátkkošteaddjiprofiila

Mátkebálvalanguovddáža áššehasaide ráhkaduvvo áššehasprofiila ja fievrridanbálvaluskoarta. Áššehasprofiilii leat čohkkejuvvon dieđut du persovnnalaš mátkedárbbuin, veahkkeneavvuin, viežžančujuhusas ja vuoigatvuođas mieđušteaddjái. Juos du profiillas lea telefonnummir, don oaččot teakstadieđu, go biila lea váldán vuostá du diŋgoma. Muitte beaivádit nuppástuvvan dieđuid Mátkebálvalanguovddážii.

Áššehasprofiila lea ovttastahtton fievrridanbálvaluskoarttain, mainna don guitát loahpas sáhtu. Doala koartta álot mielddát go geavahat fievrridanbálvalusaid. Koarta lea persovnnalaš. Koarttain oažžu máksit dušše mátkkiid iežasoasi. Koartta ii oaččo guođđit gosage, ii oba vuoddji seailluheapmái. Juos don fárret dahje koarta láhppo, almmut dan birra sosiálabálvalusaide.

Mátkkiid iežasoasi máksin

Mátkkiid iežatoasi rehket sáddejuvvo áššehasaide oktii mánus.  Vuollel 5 euro máksindáhpáhusat sirdašuvvet čuovvovaš mánotbaji rehkegii. Iežatosiid báberrehkegat sáddejuvvojit dutnje ruoktot, man maŋŋá daid sáhttá máksit iežat neahttabáŋkkus nu mo dábálaš.

Mii ávžžuhit diŋgot rehkega elektrovnnalaš e-rehkegin iežat neahttabáŋkui dahje addit báŋkui njuolggomáksinfápmudusa. Dalle báŋku dahká máksima áššehasa beales. Rehkega sáhttá diŋgot elektrovnnalažžan maiddái OmaPostii dahje iežat neahttabáŋkui. Rehkegiid ii sáhte máksit máksinkoarttaiguin dahje reaidaruđain buresveadjinguovllu doaibmabáikkiin. Iežatoasi lassin ii berrojuvvo rehketlassi.

Sáhttu ii boahtán

Juos Mátkebálvalanguovddážis diŋgojuvvon sáhttu ii boađe áiggil, sáhtát diŋgot sáhtu njuolgga du válljen tákseguovddážis dahje táksefitnodatdoallis. Sáhtát šaddat ieš máksit njuolgga diŋgojuvvon sáhtu, go buot táksiin ii leat Mátkebálvalanguovddáža koartalohkanbierggas. Seaillut mátkki guitte ja sádde guitte fievrridanmearrádusa dahkan virgeoapmahažžii vai fidnet buhtadusa. Muitte šluhttet Mátkebálvalanguovddáža bokte diŋgojuvvon sáhtu.

Gullevaš bálvalusat

Mielddusfiillat

Fievrredanbálvalusaid mieđihanákkat ja heivehanrávvagat sosiálafuolahuslága mielde (pdf)

Fievrredanbálvalusa mieđihanákkat ja heivehanrávvagat lápmásiidbálvaluslága mielde Lappi buresveadjinguovllus

Fievrredanbálvalusaid heivehanrávvagiid iežasoasitáksatabealla (pdf)

Áigeguovdil bálvalusain