Mo jienastan guovlluválggain 2025?

Jienasteapmi lea juohkeovtta 18 jagi deavdán stáhtalahtu vuođđoriekti. Don sáhtát jienastit guovlluválggain, jos deavddát eavttuid:

• Deavddát 18 jagi maŋimustá válgabeaivve.
• Don leat Suoma dahje eará EU-riikka, Islándda dahje Norgga stáhtalahttu, gean ruovttugielda lea buresveadjinguovllus 51 beaivvi ovdal válgabeaivvi.
• Don sáhtát leat maiddái eará riikka stáhtalahttu, gean ruovttugielda lea buresveadjinguovllus 51 beaivvi ovdal válgabeaivvi ja don leat ássan Suomas oktilaččat unnimusat guokte jagi ovdal válgabeaivvi.

Lassedieđut jienasteami birra: vaalit.fi/nain-aanestat-alue-ja-kuntavaaleissa

Ruovttus jienasteapmi

Sáhtát jienastit ovddalgihtii iežat ruovttus, jos dutnje lea menddo váttis jienastit jienastanbáikkis, ovdamearkka dihte buozalmasa geažil.

Almmut iežat ruovttus jienasteapmái ruoktogielddat guovddášválgalávdegoddái maŋimustá 1.4.2025 ovdal diibmu 16. Oktavuođadieđut leat jienastanriektealmmuhusas. Sáhtát jearrat guovddášválgalávdegottis lassedieđuid ruovttus jienasteami birra. Guovddášválgalávdegottiid oktavuođadieđut vaalit.fi- siidduin

Ná jienastat ovdajienasteamis

Sáhtát jienastit guovllu- ja gielddaválggain man beare ovdajienastanbáikkis.

Ovdajienasteapmi lea Suomas 2.4.–8.4.2025.  
Ovdajienasteapmi olgoriikkain lea 2.4.–5.4.2025.

Váldde jienastanbáikái mielde identitehtaduođaštusa, mas lea iežat govva, ovdamearkka dihte pássa, persovdnakoartta dahje vuodjinkoartta.

Jienasteapmi lágádusas

Sierranas ovdajienastanbáikkit dahjege lágádusjienastanbáikkit leat ruovttueatnamis buohcceviesut, birrajándorlaš divššu addi ja gielddaráđđehusa mearrádusain mearriduvvon sosiálafuolahusa eará doaibmaovttadagat (ovdamearkka dihte boarrásiidruovttut, dikšoruovttut ja bálvalandálut), ráŋggáštuslágádusat ja militearafuolahusa vearjogeatnegasskuvlejumi addi joavkoossodagaid fáktagottit ja Rádjegozáhuslágádusa vearjogeatnegasskuvlejumi addi ovttadagat.

Válgadoaibmagoddi, mas leat gielddaráđđehusa nammadan golbma áirasa, boahtá gieldda guhtege lágádussii doaimmahit jienasteami unnimusat ovtta ja eanemustá guovtti beaivve áigge ovdajienastanáigodagas.

Lágádusain sáhttet jienastit dušše sii, geat leat lágádusain divššus dahje leat váldon lágádusaide. Earáin, ovdamearkka dihte lágádusa bargiin, ii leat riekti jienastit lágádusjienasteamis.