Nube peeleest ášástâllâm sosiaal- já tiervâsvuođâhuolâttâsâst

Nube peeleest ášástâllâm meerhâš ášástâllâm nube ulmuu peeleest. Huolâtteijeevuotâ, väldikirje tâi hiäđukocceemmiärádâs addel vuoigâdvuođâ nube peeleest ášástâlmân.

Nube ulmuu peeleest pyehtih ášástâllâđ

• olesahasiih párnááh tâi eres aldaomâhááh, kiäh láá váldásmittum ášástâllâđ väldikirjijn ovdâmerkkân vuorâs vaanhim peeleest.
• hiäđukocceeh.
• vyeliahasii párnáá huolâtteijeeh, kiäh tipšoh aašijd párnáá peeleest, jis ápálâžžân árvuštâllum vyeliahasâš ij lah kiäldám suu peeleest ášástâllâm.

Huolâtteijein lii vuosâsaajeest ovdâsvástádâs vuálá 18-ihásii párnáá pyereestvajemist. Vyeliahasâš puáhtá kuittâg haalijddijnis kieldiđ tiervâsvuođâtilásis já tipšosis lahtojeijee tiäđuidis adelem jieijâs huolâtteijei, jis sun áppád jieijâs ave já otânâššâmtääsi iähtun meridiđ jieijâs tipšoost.

Ravvuuh nube peeleest ášástâlmân

Taan siijđo vyeliroobdâst kaavnah minstârvuáđuid väldikirjevuáđuin, maid puávtáh ávhástâllâđ ko ášástâlah miiguin. Väldikirje puáhtá rähtiđ meiddei rijjâhámásávt čálálâžžân, ko tot peri siskeeld vattum tiäđuid. Táárbu mield tun puávtáh táttuđ väldikirjevuáđu meiddei mii ášástâllâmsoojijn tâi kirjimkontturist.

Mij avžuuttep kirjiđ nube peeleest ášástâllâm Suomi.fi-palvâlusâst, já talle váldásmittem puáhtá ávhástâllâđ Laapi pyereestvaijeemkuávlu äigiväridempalvâlusâin sehe räijejum häämist uásist mii ášástâllâmpalvâlusâin sehe apteekášástâlmist já tiervâsvuođâhuolâttâs JieččânKantast. Suomi.fi-váldásmitmijd ij pyevti tärhistiđ eres palvâlusâin, nuuvt ete mij tarbâšep meid toid sierâ váldásmittem mijjân toimâttum väldikirjen.

Suomi.fi: Váldásmitmeh

Jis tun halijdah adeliđ nube ulmui väldikirje tuu peeleest ášástâlmân, tooimâ návt

1. Printtii, teevdi já vuáláčääli vuoluupele “Väldikirje pyecceeäššikiirjij luovâtmân” –luámáttuv
2. Maaccât luámáttuv tuu palvâlus ohtâvuođâulmui äššigâsteivâdem tâi kollim ohtâvuođâst tâi vuolgât tom poostâ mield luámáttuvâst kávnojeijee macâttemčujottâsân.
3. Jis äššikirje maaccât kiinii eres ko váldásmittee jieš, mij väldip táárbu mield väldikirje adeleijei ohtâvuođâ, vâi pyehtip visásmittiđ väldikirje rievtisvuođâ.

Väldikirje vyerkkejuvvoo mii äššigâs- tâi pyecceetiätuvuáhádâhân. Ko halijdah lopâttiđ väldikirje vyeimistorroom, printtii vuoluupele “Pyecceeäššikiirjij luovâtmân adelum väldikirje maasâdkeessim” -luámáttuv já teevdi tom. Maasâdkeessimluámáttuv puáhtá macâttiđ poostâ mield tâi persovnlávt mii toimâsajan. Meiddei maasâdkeessimluámáttâh vyerkkejuvvoo äššigâs- tâi pyecceetiätuvuáhádâhân.

Registertuállen já tiäđui luovâtteijen mist lii ovdâsvástádâs tast, ete tiäđu luovâttem tâi muštâlem tábáhtuveh laavâmiäldásávt, tiätusyeje já syeligâsâsttoollâm vátámušâid huámmášdijn. Mist lii kenigâsvuotâ visásmittiđ tiäđuid pivdee váldálii identiteet. Lasseen virgeomâhâš kalga haldâttâhlaavâ (434/2003) 12 § vuáđuld majemuš kenigâsvuotâ árvuštâllâđ váldásmittem lyetittetteevuođâ ovdâmerkkân tiäđuštâlmáin tom váldásmittest.

Väldikirje pyecceeäššikiirjij luovâtmân (pdf)

Pyecceeäššikiirjij luovâtmân adelum väldikirje maasâdkeessim (pdf)