EU aalmlaž teâttsuejjšiõttõõzz mieʹldd “personteâđain” õõlǥte pukid tobdstum leʹbe tobdstemnalla åårrai luândlaž ooumže, mâʹŋŋlubust “rekisterõsttum”, kuulli teâđaid. Tobdstemnalla ååʹrjen âʹnne luândlaž oummu, koon vueiʹtte vuõiʹǧǧest leʹbe pannvuõiggsânji tobdsted jeäʹrbõʹžžen tobdstemteâđai, mâʹt-a nõõm, persontobdldõõǥǥ, sâjjeemteâđai, neʹtt-tobdstemteâđai leʹbe õõut leʹbe tääuʹjab suʹnne jiiʹjjesnallšem fyyslaž, fysioloogglaž, geneettlaž, psyykklaž, tällsaalʼlaž, kulttuurlaž leʹbe sosiaalʼlaž raajji vuâđast.
“Ǩiõttʼtõõllmõõžžin” õõlǥte tååim leʹbe tååimaid, koid puõttlâʹstte personteâđaid leʹbe personteâđaid siiʹsǩeem teâttjooukid automaattlaž teâttǩiõttʼtõõllmõõžž ââʹneen leʹbe manuaalʼlânji, mâʹt-a teâđai noorrmõš, ruõkkmõš , jäʹrjstummuš, jeärggummuš, seeiltummuš, miâllmõš, leʹbe mottmõš, ooccmõš, kõõjjtõõllmõš, âânnmõš, teâđai luõvtummuš seeʹrdeel, liâvteeʹl leʹbe šiõtteeʹl tõid muđoi vuäǯǯamnalla, teâđai õʹhttesuåvtõõllmõš leʹbe õhttummuš, rääʹjtummuš, jaukkummuš leʹbe hiâvtummuš.
“Rekisterõõʹnnʼjin” õõlǥte luândlaž oummu leʹbe juridiiglažoummu, veʹrǧǧneeʹǩǩ, veʹrǧǧkoontâr leʹbe jeeʹres organisaatio, kååʹtt õhttu leʹbe õõutsââʹjest järrsivuiʹm meäʹrtââll personteâđai ǩiõttʼtõõllâm õõlǥtõõzzid da kuånstid. Lappi pueʹrrvââjjamvuuʹdest rekisterõõʹnnʼjen tåimmai vuʹvddhalltõs da rekisteeʹri vaʹstteemvuõttooumžen tåimma vuõss-sââʹjest tåimmsueʹrǧǧjååʹđteei leʹbe jeeʹres vuʹvddhalltõõzz nõmmeem ooumaž.