Tååđteʹmesvuõtt kääzzkõʹsse leʹbe hoiddu
Tååđteʹmesvuõtt kääzzkõʹsse leʹbe hoiddu
Mošttʼtõs
Jõs leäk tååđtem vuäǯǯmad hoiddu, kääzzkõʹsse leʹbe tõõzz õhttneei âânnmõʹšše, vuäitak raajjâd ääʹššest ǩeerjlaž mošttʼtõõzz. Mij siâzztõõllâp vuõššân saǥstõõllâd håidd-/kääzzkõsjuâkksin vaiggâdvuõđâst tõn čååudõõzz diõtt.
Tõi toiʹmmjemjuâkksi vasttõsoummu, koid äʹšš kuâskk ǩiõttʼtâʹlle mošttʼtõsääʹššad. Mij vaʹstteep tuu mošttʼtõʹsse ǩeerjlânji mâŋŋa ko leäp raajjâm čiõlǥtõõzzid tõʹst, määnpââʹj seʹst mošttʼtõõzz dooidmõõžžâst. Jõs mošttʼtõs kaiʹbbai veiddsõs čiõlǥtõõzz, vaʹstteep kueiʹt määnpââʹj seʹst.
Mošttʼtõõzz raajjmõš ij jaukkâd tuu vuõiggâdvuõđ kueʹddlâʹstted hååidast, kääzzkõõzzâst leʹbe âânnmõõžžâst sosiaal- da tiõrvâsvuõttkääzzkõõzzid vuåppi veʹrǧǧniiʹǩǩid, mâʹte ouddmiârkkân Valviraaʹje, Vuʹvddvaaldâšmkonttra leʹbe Eeʹttiǩ-kååʹdd vuõiggâdvuõttäʹššooumže. Mošttʼtõõzz raajjmõš ij ni rääʹjet puõʒʒi vuõiggâdvuõđ tuejjeed puõccipååʹmehiʹlmmtõõzz.
Vuäitak tieuʹdded da vuõltteed lomaakkid liâđǥlânji leʹbe pååʹšt mieʹldd. Maacctemaddrõõzz kaaunak lomaakkâst.
Liâđǥlaž raukkmõõžž vääras âlgg vuõššân rekisterõõttâd Suomi.fi-viestit-kääzzkõõzz õõʹnnʼjen neʹttbaŋkktiõttivuiʹm, mobiilstaanõõǥǥin leʹbe liâđǥlaž persoonkoortin addrõõzzâst: https://suomi.fi/viestit/viestiketjut/.
Rekisterõõttmõõžž mâŋŋa tiuddeet liâđǥlaž lomaakk. Lomaakk tiuddummuž mâŋŋa tobddeet ravvsanja Suomi.fi-viestit -kääzzkõʹsse. Vuõlttuum lomakk käunnai kääzzkõõzz vuõlttuum saaǥǥ -vueʹzzest.
Sosiaalhuâl äʹššneeʹǩǩ mošttʼtõs liâđǥlânji
Sosiaalhuâl äʹššneeʹǩǩ mošttʼtõs (priʹnttjemnallšem lomakk)
Puõʒʒi hååid da âânnmõõžž kuõskki mošttʼtõs liâđǥlânji
Puõʒʒi hååid da âânnmõõžž kuõskki mošttʼtõs (priʹnttjemnallšem lomakk)
Nuuʹbb peäʹlest mošttʼtõõzz raajjmõš
Nuuʹbb peäʹlest mošttʼtõõzz raajjmõš õõlǥat äʹššneeʹǩǩest leʹbe puõccjest väʹlddǩeeʹrj ääʹšš ǩiõttʼtõõllmõõžž vääras. Väʹlddǩeeʹrj âlgg õhtteed mošttʼtõʹsse. Siâzztõõllâp, što saǥstõõlak vuäittmõõžži mieʹldd äʹššniiʹǩǩin/puõccjin da kovvääk suu vuäinalm mošttʼtõõzzâst, ko äʹššääk väʹlddǩiiʹrjin.
Jõs äʹššääk huõlteeʹjen päärna peäʹlest, 12 eeʹǩǩed teâuddam päärnast âlgg vuäǯǯad miâstmõõžž. 12 eeʹǩǩed teâuddam päärnaž vuâllaǩeeʹrjat mošttʼtõõzz miâstmõõžž miârkkân.
Jõs äʹššneǩ leʹbe puõcci ij vueiʹt, ouddmiârkkân tiõrvâsvuõttvueʹjjes diõtt, jiõčč tuejjeed mošttʼtõõzz leʹbe son lij jäämmam, mošttʼtõõzz vuäitt suu peäʹlest raajjâd ruått leʹbe õõldâsooumaž pååđai väʹlddǩeeʹrjtää. Mij raukkâp täin vueʹjjin kovvõõllâd lââʹssteâttǩeeʹddest määin, koon diõtt puõcci leʹbe äʹššneǩ ij vueiʹt jiõčč raajjâd mošttʼtõõzz leʹbe väʹlddǩeeʹrj. Ruåttvuõđ âlgg čuäʹjted veʹrǧǧtuõđštõõzzin, mõõn õhtteet mošttʼtõʹsse.
Pååʹmehkoʹrvvõs
Pååʹmehkoʹrvvõõzz vuäitt ooccâd, jõs pueʹrrvââjjamvuuʹd kääzzkõõzzi ââʹnnem õhttvuõđâst lie läppjam leʹbe muärrjam jällmõõžž leʹbe puättam jeeʹres pååʹmeh, mâʹst lie šõddâm kool. Pååʹmehkoʹrvveemlomaakk vuäitt teâuʹdded da vuõltteed kueiʹtnalla.
Priʹnttjemnallšem PDF-lomakk neʹttseeidain
Vuäitak laaddâd da priʹnttjed lomaakk, teâuʹdded tõn da tååimted vuäʹppõõzzi meâlddsânji pååʹšt leʹbe staan-neʹttpååʹšt mieʹldd. Liŋkk lomaʹǩǩe: Pååʹmehkoʹrvveemlomakk läppjam leʹbe märrjam jällmõõžžâst (priʹnttjemnallšem lomakk)
Digitaalʼlaž lomakk DigiLaphast
8.10.2025 ääʹljeeʹl pååʹmehkoʹrvveemlomakk käunnai DigiLapha-kääzzkõõzzâst še, Lomaakk-pääiʹǩest. Lomaakk vuäitt teâuʹdded da vuõltteed liâđǥlânji vuõiʹǧǧest kääzzkõõzzâst.
Teâtt da tuäʹrjj jeeʹresåʹrnn neeʹttest
Kueʹddlâsttmõš vuʹvddvaaldâšmkonttra da Valviraaʹje