Vuäppõõzz ougglõsvuâsttavälddmõʹšše da -vuõinnlõõttmõʹšše OmaVirtust
Vuäppõõzz ougglõsvuâsttavälddmõʹšše da -vuõinnlõõttmõʹšše OmaVirtust
Jäʹrjstep sosiaal- da tiõrvâsvuõttkääzzkõõzzid še neeʹttest ougglõsõhttvuõđ pääiʹǩ.
Täʹst vuäppõõzzâst čiõlǥtep, mäʹhtt vuäitak vuässõõttâd ougglõs-vuõinnlõõttmõʹšše ämmat-tuâjjlain.
Ougglõsvuõinnlõõttmõõžž OmaVirtu pääiʹǩ
- Jäʹrjstep ougglõsvuõinnlõõttmõõžžid OmaVirtu pääiʹǩ. OmaVirtu lij neʹttkääzzkõs Lappi pueʹrrvââjjamvuuʹd äʹššniiʹǩǩid.
Mäʹhtt valmštõõđak ougglõsvuõinnlõõttmõʹšše?
- Pueʹrrvââjjamvuuʹd ämmat-tuâjjlaž vaʹrrai tuʹnne ääiʹj ougglõsvuõinnlõõttmõʹšše.
- Vuäǯǯak teʹksttsaaǥǥin raaveem vaʹrrjum ääiʹjest da ougglõsvuõinnlõõttmõõžž ääʹššest.
- Muuʹšt särnnad, jõs taarbšak tuulk, ǥu tuʹnne vaʹrrjet ougglõsvuõinnlõõttmõõžž. Ämmat-tuâjjlaž tiʹllai tuʹnne tuulk.
Taarbšak aparaatt da interneʹtt-õhttvuõđ
- Ougglõs-vuõinnlõõttmõõžžâst vuäitak ââʹnned teâttmašina, tableʹtt-teâttmašina leʹbe toolkteʹlfoon.
- Aparaattâst feʹrttai leeʹd kamera, mikrofon di šääiǥan leʹbe kulstõõǥǥ.
- Taarbšak še interneʹtt-õhttvuõđ.
Vuäitak ââʹnned ougglõsvuõinnlõõttmõõžžâst teâttmašina leʹbe toolkteʹlfoon.
- Jõs âânak ougglõsvuõinnlõõttâm poodd teâttmašina, tuʹst ij taarbâž laaddâd Microsoft Teams-prograamm teâttmašinaaʹje. Tuʹst ij veʹt taarbâž rekisterõõvvâd leʹbe ǩeeʹrjtõõttâd sizz prograʹmme.
- Teams-prograamm âânnmõʹšše taarbšak Google Chrome- leʹbe Microsoft Edge- interneʹttplaađânj.
- Jõs âânak ougglõsvuõinnlõõttmõõžžâst toolkteʹlfoon leʹbe tableʹtt-teâttmašina, tuʹst feʹrttai laaddâd Microsoft Teams-suåvldõõzz jiijjad aparaʹtte.
- Ääʹved aparaattâst åårrai suåvldõskaaup, kååʹtt lij juʹn-a Play Kauppa leʹbe App Store. Laadd suåvldõskaaupâst Microsoft Teams-suåvldõõzz jiijjad aparaʹtte.
- Laaddâm mâŋŋa, vuäitak piijjâd ǩidd suåvldõõzz. Tuʹst ij taarbâž rekisterõõvvâd leʹbe ǩeeʹrjtõõttâd sizz Microsoft Teams-suåvldõʹsse.
Ainsmââʹtt čuõv da kollʼjemvuõđ
- Vuässõõđ ougglõsvuõinnlõõttmõʹšše lõõnjâst, koʹst ij leäkku grommi tõn poodd. Ââʹn taarbšeen kulstõõǥǥid.
- Ainsmââʹtt, što lõõnjâst lij čuõvvâd čuõvv, što videokovv kuâsttai puârast.
Laadd teâttõõzzid valmmša
- Ougglõsvuõinnlõõttmõõžž poodd vuäitak čuäʹjted ämmat-tuâjjlaid äʹššǩiiʹrjid leʹbe jeeʹres teâttõõzzid. Täk vueiʹtte leeʹd ouddmiârkkân veʹrǧǧneǩtuʹmmstõõǥǥ leʹbe -ciâlkâlm.
- Laadd teâttõõzzid valmmša ââʹnnmad aparaʹtte ooudbbeäʹlnn vuõinnlõõttmõõžž. Teâttõõzzi juâkkmõš šâdd ikkânjuâǥǥ veäkka. Ämmat-tuâjjlaž vuäʹppast tuu, mäʹhtt juâǥǥak aparaatt ikkân.
Mäʹhtt vuässõõđak ougglõsvuõinnlõõttmõʹšše?
1. Ǩeeʹrjtõõđ OmaVirtuuʹje ooudbeäʹlnn ougglõsvuõinnlõõttmõõžž. Tobddâd OmaVirtu neʹttkääzzkõʹsse neʹttbaŋkktiõttjin leʹbe mobiilstaanõõǥǥin leʹbe raʹvvjemkoortin.
2. Jõs âânak teâttmašina, kaaunak tuʹnne vaʹrrjum ougglõsvuõinnlõõttmõõžžid OmaVirtu ouddseeidast pâʹjjreeuʹn vaaljstõõǥǥâst.
3. Jõs âânak tableʹtt-teâttmašina leʹbe toolkteʹlfoon, kaaunak tuʹnne vaʹrrjum ougglõsvuõinnlõõttmõõžžid OmaVirtu ouddseeidast pâʹjjreeuʹn vaaljstõõǥǥâst.
4. Ääʹved ougglõsvuõinnlõõttmõõžž Teams-liiŋk vitt minuutt ooudbeäʹlnn vuõinnlõõttmõõžž aalǥ.
5. Ainsmââʹtt, što kamera da mikrofon toiʹmmje.
6. Ǩeeʹrjet jiijjad ouddnõõm da teäʹddel teäʹddõõzz Liity kokoukseen vieraana.
7. Piâssmõõžž mâŋŋa cõõjõõđak vueʹrddemlõʹnnje (odotustila). Vueʹrd rääuhast, što sosiaal- da tiõrvâsvuõttsueʹrj ämmat-tuâjjlaž puätt video-õhttvuõđin mieʹldd ougglõsvuõinnlõõttmõʹšše.
Vaʹlljed pâʹjjvaalljstõõǥǥâst pääiʹǩ Etätapaamiset
- Tobddummuž mâŋŋa cõõjõõđak OmaVirtu-neʹttkääzzkõʹsse.
- Vaʹlljed pâʹjjvaalljstõõǥǥâst pääiʹǩ Etätapaamiset, koʹst cõõjõõđak Etätapaamiset-sijddu.
Etätapaamiset- seeidast vuäinak tuʹnne vaʹrrjum aaiʹjid
- OmaVirtu Etätapaamiset- seeidast vuäinak tuʹnne vaʹrrjum ougglõsvuõinnlõõttmõõžžid.
- Ougglõsvuõinnlõõttmõõžžâst ââʹnnep teâttstaani Microsoft Teams-prograamm. Ougglõsõhttvuõtt lij suõjjuum da luõʹttjemvuâlaž. Kaart da jiõn jeät ruõkku.
Mäʹhtt âânak Keskustelu-ǩeeʹdd?
- Ougglõsvuõinnlõõttmõõžžâst vuäitak ǩeeʹrjted Teams-prograamm Keskustelu-ǩeâdda, koʹst ämmat-tuâjjlaž vuäinn tuu teeʹkst.
- Teâttsuõjj diõtt Keskustelu-ǩeâdda ij vuäǯǯ ǩeeʹrjted persoonteâđaid, ouddmiârkkân persoontiõtt. Ougglõsvuõinnlõõttmõõžž mâŋŋa Keskustelu-ǩeâdda ǩeeʹrjtum teeʹkst läppje.
- Vuäitak ǩeeʹrjted Keskustelu-ǩeâdda, jõs tuʹst lij mii-ne vaiggâdvuõtt ougglõsõhttvuõđâst. Jõs vaiggâdvuõđ ij vueiʹt koʹrjjeed viiđ minuutt poodd, ämmat-tuâjjlaž såitt tuʹnne teʹlfoonin.
- Ämmat-tuâjjlaž vuäitt vuõltteed tuʹnne ougglõsvuõinnlõõttmõõžž poodd liiŋkid da vuäppõõzzid Keskustelu-ǩeâdda. Muuʹšt ääʹveed liiŋkid da vuäppõsteâttõõzzid juʹn vuõinnlõõttmõõžž poodd. Ougglõsvuõinnlõõttmõõžž mâŋŋa vuäitak rääuhast tobdstõõttâd tõid.
Ougglõsvuâsttavälddmõš da ougglõsvuõinnlõõttmõš - čiõlggǩiõllsaž vuäppõs
Vuäitak ǩiõččâd vuäppõõzzid ougglõsvuâsttavälddmõõžžâst da ougglõs-vuõinnlõõttmõõžžâst vueʹlnn åårrai čiõlggǩiõllsaž videost.
Maacctõs
Iʹlmmet, kauʹnniǩ-a vuäppõõzzin ooccmad vieʹǩǩ tieʹddeeʹl vueʹlnn åårrai teäddõõǥǥid. Teäddõõǥǥ teäʹddlem mâŋŋa vuäitak ǩeeʹrjted maacctõõzz leʹbe särnnad, måkam jeeʹres äšša tuäiʹvčiǩ vuäppõõzzid.
