Kuäʹss mon õõlǥam mõõnnâd kååccmõʹšše?

Krootai puõʒʒâlmroʹttjõõzzin da jieʹttvueʹjjest soiʹtte 112.

Ǩirrsallaš hååid kaiʹbbjeei puõʒlmin kaʹnnat vuõss-sâjjsânji leeʹd õhttvuõđâst jiijjâs tiõrvâsvuõttpõʹrtte. Soiʹtte tok tâʹlles tueʹlää, ko ääiʹjvaʹrrjummuž ääʹveet.

Kååccmõõžžâst hoiʹddjet suutki pirr nåkam puõccjid, kooi puõʒʒâlm leʹbe vââʹjj hååid jeät vuåittu mââʹjeed oudldõõzzi hueʹnben mõõnnâmtää leʹbe vââʹjj vaigsmõõvvâmtää.

Näkam oudldõõzz lie ouddmiârkkân

• krootai čueʹccem, koon ij ǩiõllu
• pååʹmh, kääddak morddjummuž leʹbe jiânnai võʹrddi hääʹvv
• rõõʹddi sälbbmõš, koon tuʹlǩǩeet, što tõt lij čâđđmest vuâlǥaž
• krootai šååkk
• krootai vieʹmmoudldõs: krootai mainstemheâmmõs, njäʹlmmpeäʹl sorččmõš da/leʹbe nuuʹbbpeällsaž teäʹǩǩviõǥǥteʹmesvuõtt
• krootai kõrr vueiʹvvjoortõs
• krootai kõrr leʹbe kõrsmeei čåuʹjjčueʹccem
• akutt miõlltiõrvâsvuõttvaiggâdvuõtt, aicc-čaʹjjõõzz, jiiʹjjes čuõʒʒtummuš
• viõusâs alleerǥlaž reaktio

Mâid vääldak mieʹldd?

Lij vääžnai, što vääldak mieʹldd ääiʹjtässʼsaž taalkâsliist da/leʹbe taalkâsreseeʹptid, ko kååccmõõžžâst ij vieʹltǩani leäkku teâtt tuu vuâđđpuõʒlmin da tõi taalkummšin.

Kaʹnnat väʹldded mieʹldd še ǩiõrddâmvuõđ tõn diõtt, ko kååccmõõžžâst jåudd täujja vueʹrdded dåhttar årra piâssmõõžž. Hååid uuʹdet pâi ǩirrsallašvuõttjiârǥ mieʹldd, jeät iʹlmmtõõttâmjiârǥ mieʹldd.

Jõs jiõk jiõčč pââʹst čiõʹlǧǧeed kååccmõʹšše puättmõõžž määin da puâccjummuž oudldam šõddmõõžžid, lij šiõǥǥ, što mieʹldd lij õhtt saʹtti.